Hamasi ka refuzuar propozimin nga Izraeli për armëpushim gjashtëjavor në Rripin e Gazës.
Ky propozim përfshinte një kusht që grupi të dorëzonte armët.
Sipas një zyrtari të lartë palestinez të përfshirë në negociata, plani nuk përfshinte asnjë angazhim për t’i dhënë fund luftës apo për tërheqjen e trupave izraelite, dy nga kërkesat kyçe të Hamasit, në këmbim të lirimit të gjysmës së pengjeve që mbahen ende gjallë.
Ky zhvillim vjen në kohën kur ofensiva ushtarake izraelite në Gaza po vazhdon me intensitet.
Një sulm ajror izraelit në një spital fushor në Khan Younis shkaktoi vdekjen e një roje sigurie dhe plagosjen e nëntë personave të tjerë, sipas burimeve spitalore.
Forcat e Mbrojtjes të Izraelit (IDF) nuk kanë komentuar ende për incidentin.
Ndërkohë, Kombet e Bashkuara kanë paralajmëruar për përkeqësimin e mëtejshëm të situatës humanitare në Gaza. Zyra e OKB-së për çështje humanitare (OCHA) ka thënë se “situata humanitare në Gaza është tani më e keqja që nga shpërthimi i armiqësive, 18 muaj më parë”.
Ka kaluar më shumë se gjashtë javë që nga hera e fundit kur Izraeli lejoi furnizime përmes kalimeve në territorin palestinez – periudha më e gjatë e bllokadës deri më tani. Agjencitë e OKB-së kanë hedhur poshtë pretendimin izraelit se ka furnizime të mjaftueshme ushqimore në Gaza dhe kanë sugjeruar se bllokada mund të përbëjë shkelje të ligjit ndërkombëtar humanitar.
Nga ana tjetër, kryeministri izraelit Benjamin Netanyahu ka deklaruar se kufizimi i furnizimeve ka për qëllim ushtrimin e presionit ndaj Hamasit për lirimin e pengjeve dhe për të nxitur zgjatje të armëpushimit që përfundoi më 1 mars.
Zyra e OKB-së për çështje humanitare gjithashtu raportoi se partnerët në terren kanë vërejtur rritje të sulmeve që po shkaktojnë viktima masive në mesin e civilëve dhe po shkatërrojnë infrastrukturën jetike që u nevojitet njerëzve për të mbijetuar.
