Është ndarë nga jeta gazetari Sylejman Shaqiri. Lajmin e ka bërë të ditur Asociacioni i Gazetarëve të Kosovës.
Përmes një telegram ngushëllimi, AGK-ja e ka ngushëlluar familjen Shaqir.
Në këtë telegram thuhet se Shaqiri ka qenë gazetar, redaktor dhe korrespodent në disa televizione.
“Sylejman Shaqiri dha kontribut të pashoq në gazetari dhe media. Karrierën e nisi në fillim të viteve ’80, në Radio Ferizaj, ku shërbeu si kryeredaktor dhe drejtor, për të vazhduar më pas në Radio Televizionin e Prishtinës si gazetar dhe redaktor përgjegjës. Pas mbylljes së dhunshme të RTP-së, kontributi i tij vazhdoi në Radio Kroacia dhe Radio Tirana. Pas luftës mbajti pozitat më të larta, duke përfshirë atë të drejtorit të përgjithshëm të Radio Televizionit të Kosovës (RTK), ku ishte edhe redaktor lajmesh e udhëheqës i disa emisioneve. Shaqiri do të kujtohet për profesionalizmin e tij, përkushtimin ndaj profesionit dhe rolin e tij udhëheqës në zhvillimin e mediave në Kosovë. Asociacioni i Gazetarëve të Kosovës shpreh ngushëllimet më të sinqerta për familjen Shaqiri, kolegët dhe miqtë e tij”, është thënë në telegramin e ngushëllimit të AGK-së.
