Sulme raketore janë kryer në Ukrainën perëndimore, afër kufirit me Poloninë, duke detyruar aktivizimin e mbrojtjes ajrore të Ukrainës dhe aleatëve të saj. Ushtria polake njoftoi se masat janë marrë për të garantuar sigurinë në rajonet pranë zonave të kërcënuara.
Nga ana tjetër, Ministria e Mbrojtjes së Rusisë e përshkroi sulmin si një përgjigje ndaj sulmeve të Kievit ndaj bazave ruse gjatë këtij muaji, duke pretenduar se të gjitha objektet e synuara janë goditur.
Sekretari i Përgjithshëm i NATO-s, Mark Rutte, theksoi nevojën për një “kërcim kuantik” në mbrojtjen ajrore dhe raketore të aleancës, duke kërkuar një përmirësim prej 400% për t’u përballur me kërcënimet në rritje, në një fjalim të mbajtur në Londër me Kryeministrin britanik Keir Starmer.
Ai përmendi se Rusia po përhap “terror nga ajri” dhe theksoi nevojën për mijëra automjete të blinduara, tanke dhe miliona predha artilerie, duke paralajmëruar se rreziku do të mbetet edhe pas përfundimit të luftës.
Lufta më shumë se trevjeçare në Ukrainë vazhdon të përshkallëzohet, ndërsa përpjekjet për arritjen e një marrëveshjeje paqeje mes Kievit dhe Moskës kanë ngecur, me Ukrainën që kërkon armëpushim pa kushte dhe Rusinë që vazhdon ta refuzojë këtë opsion.
