Policia e Kosovës ka zhvilluar një aksion të gjerë kundër trafikimit të narkotikëve në Prishtinë, i koduar me emrin “Lugu”, ku si rezultat janë arrestuar gjashtë persona të dyshuar dhe janë sekuestruar sasi droge, para dhe automjete,
Sipas njoftimit të Policisë, operacioni është realizuar më 6 gusht 2025, rreth orës 12:00, me autorizimin e Prokurorisë Themelore dhe me urdhëresë të Gjykatës në Prishtinë, ku në kuadër të planit operativ, u kryen kontrolle në tetë lokacione të ndryshme, përfshirë shtëpi, banesa dhe objekte përcjellëse, ndërsa me urdhër të prokurorit është mbyllur edhe një lokal (free shop).
Policia njofton se operacioni është mbështetur nga Njësia Speciale Operative, Drejtoria e Teknikës Kriminalistike, njësia K9 si dhe njësi patrulluese nga rajoni i Prishtinës.
Gjatë aksionit, në cilësinë e provave materiale u sekuestruan: 300 gramë substancë e dyshuar narkotike e llojit kokainë, me vlerë rreth 18 mijë euro, 13,294 euro para të gatshme, 2 DVR, 5vetura me targa vendore, si dhe prova të tjera që ndërlidhen me rastin.
Të dyshuarit u shoqëruan për intervistim në prani të avokatëve mbrojtës dhe, me vendim të prokurorit të shtetit, u ndaluan për 48 orë.
Ndërkohë, gjatë ditës së sotme, Policia ka kryer edhe një veprim shtesë në lidhje me këtë rast.
Me urdhëresë të gjykatës u kontrolluan pesë automjete të sekuestruara, dhe në njërën prej tyre, pronë e një të dyshuari, u gjetën dy qese me rreth 35 gramë substancë të dyshuar narkotike të llojit kokainë. Kontrolli u krye në prani të avokatit mbrojtës.
