Deputetja e VV-së, Fitore Pacolli, po pretendon se disa parulla që u shfaqën sot në Prishtinë, me thirrjet “Albin dorzohu në prokurori”, janë bërë nga një OJQ që e ka themeluar kryeprokurori i Prokurorisë Speciale, Blerim Isufaj.
Pretendimin se Isufaj i lansoi parullat ajo e bëri në profilin e saj në Facebook.
“Breaking News: Blerim Isufaj themelon një OJQ e cila lansohet publikisht me parullën e parë të zezë në Prishtinë: “Albin dorzohu në prokurori”, ka shkruar ajo.
Në hapësira të ndryshme në Prishtinë, sot u shfaqën disa parulla ku i bëhej thirrje kryeministrit në detyrë Albin Kurti që të dorëzohej në Prokurori, kjo pasi Kurti disa herë me radhë nuk i ka përfillur kërkesat e Prokurorisë Speciale, për të shkuar dhe për t’u intervistuar si dëshmitar në rastin e rezervave shtetërore.
Kurti refuzon të shkojë në Prokurori me arsyetimin se nuk dëshiron të bëhet “lajm botëror”, që kinse kryeministri po dyshohet për një rast korrupsioni.
Ai ka kërkuar që Prokuroria e Shtetit të shkojë te ai në zyrë.
