Paneli Zgjedhor për Ankesa dhe Parashtresa (PZAP) ka aprovuar ankesën e subjektit politik Demokracia Serbe, duke anuluar vendimin e Komisionit Qendror të Zgjedhjeve (KQZ) për mos-certifikimin e listës së kandidatëve të kësaj partie për Zgjedhjet Lokale të 12 Tetorit 2025.
Kryetar i kësaj partie është Aleksandar Arsenijeviq, gjendet ende në arrati nga qershori i këtij viti, pasi që në një objekt të tij nga Policia e Kosovës ishte gjetur një arsenal armësh.
Arsenijeviq është shpallur në kërkim nga Policia e Kosovës dhe ndaj tij është lëshuar një urdhërarrest.
Sipas vendimit të Panelit (A.nr. 6/2025, 29.08.2025), KQZ-ja kishte refuzuar certifikimin e listës së kandidatëve të Demokracisë Serbe, pavarësisht se Zyra për Regjistrim, Certifikim dhe Kontrollin Financiar të Subjekteve Politike kishte konfirmuar se të gjitha kushtet ligjore për certifikim ishin përmbushur.
PZAP-i thekson se vendimi i KQZ-së nuk kishte dhënë arsyet e refuzimit dhe ishte në kundërshtim me dispozitat ligjore, duke cenuar të drejtat e subjekteve politike për pjesëmarrje të barabartë në zgjedhje. Si rrjedhojë, PZAP urdhëroi KQZ-në që të certifikojë listën e kandidatëve të Demokracisë Serbe, duke respektuar rekomandimin e Zyrës për Regjistrim dhe kriteret ligjore të vendosura në Ligjin për Zgjedhjet e Përgjithshme.
Në vendim gjithashtu theksohet se subjektet politike dhe kandidatët kanë të drejtë të ankohen në Gjykatën Supreme të Kosovës brenda 48 orëve nga marrja e këtij vendimi.
Kandidat është edhe vet Arsenijeviq nga arratia.
Kandidatët e kësaj partie:
• Mitrovica e Veriut – Aleksandar Arsenijeviq
• Zveçan – Zoran Obrenoviq
• Leposaviq – Vladimir Radosavljeviq
• Zubin Potok – Mirjana Vlašković
Kryesuesi i listës së këshillit për secilën komunë është:
• Mitrovica e Veriut – Aleksandar Arsenijeviq
• Zveçan – Zoran Obrenoviq
• Leposaviq – Vladimir Radosavljeviq
• Zubin Potok – Vesna Radiq
