Gjykata Themelore në Gjakovë ka caktuar një muaj paraburgim për të pandehurin G.B. për veprën penale të narkotikëve.
Masa e paraburgimit u aprovua pas kërkesës së Prokurorisë Themelore të Gjakovës, me arsyetimin se ekziston dyshimi i bazuar se i pandehuri ka kryer veprën penale të “blerjes, posedimit, shpërndarjes dhe shitjes së paautorizuar të narkotikëve, substancave psikotrope dhe analoge”.
Sipas Prokurorisë, më 8 shtator 2025, rreth orës 17:55, në fshatin Ponoshec të Komunës së Gjakovës, G.B. ishte ndaluar nga patrulla e policisë kufitare gjatë kontrollit të një automjeti me targa të ardhura nga Shqipëria.
Gjatë kontrollit, nën asistimin e Njësisë K9, në bagazhin e automjetit u gjetën dy qese me marihuanë të fshehura me peshë 1.048 kg dhe një qese më e vogël 1.77 gram.
Komunikata:
Një (1) muaj paraburgim ndaj të pandehuri G.B., për vepër penale të narkotikëve Gjykata Themelore në Gjakovë ka aprovuar kërkesën e Prokurorisë Themelore të Gjakovës, duke i caktuar masën e paraburgimit një (1) muaj të pandehuri G.B., shtetas i Republikës së Kosovës, për shkak të dyshimit të bazuar se kryer veprën penale, “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Sipas kërkesës së Prokurorisë, ndër të tjera ceket se “ekziston dyshimi i bazuar se i pandehuri me inicialet G.B., shtetas i Republikës së Shqipërisë, më datë 08.09.2025 rreth orës 17:55, në fshatin Ponoshec, Komuna e Gjakovës, pa autorizim dhe me qëllim të shitjes ka transportuar substanca apo preparate të cilat me ligj janë shpallur si narkotikë, substanca psikotrope ose analoge, në atë mënyrë që patrulla e policisë kufitare nga SPMK-Ponoshec, gjatë patrullimit kanë ndalur veturën me targa …., të cilin po e drejtonte i pandehuri i cili kishte ardhur nga Republika e Shqipërisë dhe pas ndaljes se automjetit gjatë komunikimit me shoferin është ndier një aromë e dyshuar për narkotik, fillimisht është pyetur i pandehuri se a ka diçka ilegale në veturë, i njëjti është përgjigjur se jo, ndërsa gjatë kontrollit të automjetit nën asistimin edhe të zyrtarëve policor të Njësisë K9 brenda në automjet janë gjetur dy qese narkotiku e dyshuar të llojit marihuanë të fshehura në bagazhin e automjetit në peshë prej 1kg e 048 gram dhe një qese e vogël e fshehur nën plastikën e fshesave të automjetit në peshë prej 1.77 gram, sasia e narkotikut, automjeti, 246 Euro dhe 5,000 lekë shqiptare janë sekuestruar nga zyrtarët policor”.
