Trajneri i Juventusit, Igor Tudor, ka konfirmuar se sulmuesi kosovar Edon Zhegrova nuk do të jetë i gatshëm as për derbin ndaj Interit, e as për ndeshjen ndaj Borussia Dortmundit.
Zhegrova iu bashkua gjigantit italian në ditët e fundit të afatit kalimtar veror nga Lille, për një shumë që raportohet të jetë mes 15 dhe 20 milionë euro.
Edhe pse kishte shpresa që ai të debutonte në derbin kundër Interit, Tudor i ka hedhur poshtë këto mundësi duke theksuar se lojtari është ende në proces rikuperimi pas një periudhe të gjatë pa luajtur.
“Ai (Edon Zhegrova) po rikthehet nga një periudhë e gjatë pa luajtur. Ende i duhet kohë për ta marrë plotësisht veten, të përforcohet dhe të përmirësohet.”, tha trajneri i Juves.
Sipas Tudor, Zhegrova do të mungojë në dy sfidat e radhës, por pritet të nisë integrimin gradualisht në skuadër.
“Edoni nuk do të jetë i gatshëm për dy ndeshjet e radhës (ndaj Interit dhe Dortmundit), por do ta nisim ta integrojmë në skuadër gradualisht nga ndeshja me Veronan.”, deklaroi ai.
Derbi i madh mes Juventusit dhe Interit zhvillohet të shtunën nga ora 18:00.
