Një dramë e pazakontë është zhvilluar të martën në mbrëmje në Serbi, ku një avion i kompanisë Air Serbia, që ishte nisur nga Beogradi drejt Moskës, është detyruar të kthehet në aeroportin “Nikola Tesla”. Sipas raportimeve të mediave serbe, në avion dyshohet se ndodheshin Aleksandar Vulin, njëri nga politikanët më prorusë të Serbisë, drejtori i Srbijagas-it, Dušan Bajatović, dhe politikani Nenad Popović.
E gjithë ngjarja po shoqërohet me dyshime se Vulin po përpiqej të largohej nga Serbia për t’iu shmangur një hetimi të mundshëm penal.
Sipas televizionit N1, i cili citon portalin Nova.rs, avioni Airbus A320, me numër fluturimi JU134, ishte nisur nga Beogradi në orën 18:25, me destinacion Moskën.
Megjithatë, gjatë fluturimit, avioni ka ndryshuar drejtimin dhe është kthyer në Beograd, ku ka aterruar pak para orës 22:00.
Burime të Nova.rs pretendojnë se urdhri për kthimin e avionit është dhënë nga drejtori i sigurisë korporative të aeroportit, për arsye që thuhet se lidhen me sigurinë. Kjo rrethanë nuk është konfirmuar zyrtarisht.
Por ajo që e bën ngjarjen edhe më interesante është se, disa orë përpara nisjes së avionit, kryetari i Partisë Demokratike të Serbisë, Srđan Milivojević, kishte paralajmëruar publikisht një largim të mundshëm të dy zyrtarëve serbë drejt Rusisë.
“Dhe kush po arratiset sonte drejt Moskës, me fluturimin e orës 18:30?”, kishte pyetur ai në rrjetin social X.
Më herët, në një deklaratë për median serbe Naš Portal, Milivojević kishte pretenduar se dy politikanë po udhëtonin drejt Moskës, por me një dallim interesant: njëri kishte blerë biletë vajtje-ardhje, ndërsa tjetri vetëm vajtje.Reklamë
Sipas tij, politikani që kishte biletë vetëm vajtje ishte ish-ministër, i njohur për qëndrimet kundër integrimit evropian, dhe ndaj tij kishte filluar një hetim.
“Sepse ka filluar një hetim kundër atij njeriu që po arratiset”, kishte deklaruar Milivojević.
Mediat malazeze, përkatësisht portali ETV, i identifikuan më pas dy politikanët si Aleksandar Vulin dhe Nenad Popović, duke raportuar se ata kishin rezervuar bileta për fluturimin e mbrëmjes drejt Moskës.
Ndërkohë, gazeta serbe Republika ka raportuar për dyshime mbi keqpërdorime financiare në vlerë prej rreth 60 milionë eurosh në një institucion të Vojvodinës, duke e lidhur këtë çështje edhe me emrin e Vulinit. Pretendimet për përfshirjen e tij dhe për statusin e hetimeve nuk janë konfirmuar zyrtarisht.
Aleksandar Vulin, ish-ministër i Mbrojtjes, ish-ministër i Brendshëm dhe ish-drejtor i shërbimit inteligjent serb BIA, njihet për lidhjet e ngushta politike me Moskën dhe për qëndrimet e tij të ashpra kundër Perëndimit.
Edhe dy politikanët e tjerë, Bajatović dhe Popović, njihen për raportet e afërta me Rusinë.
N1 ka raportuar se ka kërkuar sqarime nga Air Serbia, aeroporti “Nikola Tesla” dhe Drejtoria e Aviacionit Civil, por deri në publikimin e lajmit nuk kishte marrë përgjigje. Televizioni gjithashtu kishte tentuar të kontaktonte Vulinin dhe Bajatovićin, pa sukses.
Mbetet e paqartë nëse kthimi i avionit lidhet me pasagjerët e dyshuar apo me ndonjë çështje tjetër të sigurisë. Po ashtu, ende nuk ka konfirmim zyrtar se Vulin ndodhej në avion dhe se qëllimi i udhëtimit ishte arratisja.
Megjithatë, paralajmërimi i opozitës përpara fluturimit, raportimet për biletën vetëm vajtje dhe kthimi i papritur i avionit kanë ngritur pikëpyetje serioze në Serbi.
