Nën himnin serb, Lista Serbe hapi sot fushatën zgjedhore në një tubim në Mitrovicë të Veriut.
Kryetari i Listës Serbe, Zlatan Elek, ka thënë se më 12 tetor qytetarët, sipas tij, do të çlirohen nga kryetarët “jolegjitimë të Kurtit” në komunat në veri.
“Vetëm të bashkuar dhe të bashkuar mund ta çlirojmë qytetin tonë nga kryetarët e rremë, të paligjshëm dhe jolegjitimë të Kurtit dhe për këtë arsye ju kërkoj të telefononi të gjithë fqinjët, miqtë, kumbarët, të afërmit tuaj më 12 tetor për të thënë se numërimi mbrapsht ka filluar dhe se po shkojmë drejt çlirimit të qytetit tonë. Të bashkuar mund të fitojmë dhe ta shpëtojmë qytetin tonë dhe në fund dua t’ju them – Rroftë Lista Serbe, rroftë populli ynë dhe mbi të gjitha rroftë Serbia”, tha Elek.
Kandidat për kryetar të Mitrovicës së Veriut nga Lista Serbe është Milan Radojeviq.
Ndërkaq, anëtari i Listës Serbe dhe udhëheqës i listës së këshilltarëve në Mitrovicën e Veriut, Ivan Zaporozhac tha se e kanë përmbushur premtimin duke mos lejuar formimin e qeverisë.
“Ne e kemi përmbushur premtimin tonë. Ne nuk lejuam të formohet një qeveri në Prishtinë dhe deputetët tanë po qëndrojnë atje me dinjitet dhe mbështesin vullnetin e këtij populli që Kurti nuk mund të sundojë mbi ne”, ka thënë ai.
