Ish-Ndihmëssekretari i Shtetit në administratën e Shteteve të Bashkuara gjatë viteve 1997-2000, James Rubin, sot po vazhdon dëshminë para Gjykatës Speciale, raporton Gazeta Enigma.
Ai është thirrur nga mbrojtja e Hashim Thaçit dhe po merret në pyetje nga Prokuroria.
Rubin u pyet për një artikull të gazetës The New York Times, të datës 25 qershor 1999, ku thuhej se komandantët e lartë të UÇK-së kanë kryer vrasje brenda radhëve të tyre.
Sipas artikullit të lexuar nga prokurori, Thaçi drejtoi fushatën e vrasjes së disa komandantëve.
Rubin sikurse për shumë raste të tjera tha se nuk i kujtohet ky artikull, por potencoi se ka dyshime për autorin e tij, Chris Hedges.
“Autori i këtij artikulli, në mënyrë të vazhdueshme, ka shkruar fjali që kanë qenë të rreme”, tha ai.
Pas kësaj plasoi një debat mes prokurorit dhe Rubin lidhur me gazetarin në fjalë, i cili ishte larguar nga puna në The New York Times.
