Alban Zogaj, deputeti i LDK-së, në një konferencë për media ka folur rreth aktakuzës për rastin e Rezervave shtetërore.
Zogaj thotë se ky rast ka të bëjë me favorizime të kompanive, çmime të fryra, si dhe procedura me negocim.
“Në këtë rast, e gjithë kjo është në kundërshtim me ligjin e Prokurimit, por edhe me ligjet tjera. Në këtë kontratë të negociuar, që ne e quajmë edhe kontratë sekrete, çmimi i kontraktuar i grurit ishte 483 euro për ton, kurse çmimi real i tregut në atë kohë, sipas të dhënave të Doganës ishte 290 euro për ton. Pra diferenca apo dallimi në çmim diku rreth 193 për ton, e ku dëmi total i shkaktuar ndaj buxhetit të vendit dhe taksave të qytetarëve tanë është rreth 2 milionë euro në tërësi, vetëm nga ky element i kontratës”, thotë Zogaj.
“Në këtë kontratë kemi gjithashtu të bëjmë me kompani të favorizuara, të cilat as nuk i kanë plotësuar kushtet minimale për të ofertu këto produkte, njëra prej tyre ka qenë kompani e ndërtimit, por normalisht e lidhur ngushtë me njërin nga të pandehurit, me emrin Ridvan Muharremi”, tha deputeti.
