Policia e Pejës ka deklaruar se në fshatin Shtupeq i Madh zjarri nuk është vënë ende nën kontroll të plotë. Po ashtu, bëhet e ditur se banorët e evakuuar për shkak të zjarrit, nuk janë lejuar ende të kthehen.
Në komunikatën e policisë së Pejës është bërë e ditur se rreziku në bjeshkët e Rugovës nuk ka kaluar ende.
“Nga data 30. Korrik 2021 e deri me sot, jemi dëshmitarë te shumë zjarreve qe kanë përfshirë komunat ne rajonin e Pejës e sidomos në parkun nacional në fshatin Shtupeq i Madh – Rugovë. Gjatë kësaj periudhe PK-së së bashku me partneret: FSK, Agjensioni i Emergjencave, Zjarrfikësit, Agjensioni për menaxhimin e parkut nacional, Kuvendet Komunale, Dogana po angazhohen ne vazhdimësi ne mënyrë qe zjarret te vihen nen kontroll dhe të shuhen tërësisht. Deri sa ne Komunat tjera situatën e kemi nen kontroll, zjarri ne fshatin Shtupeq i Madh ende nuk është venë nën kontroll të plotë. Dje në orët e pas ditës pas rrezikut qe u kanosej disa shtëpive të fshatit nga zjarri, banoret janë evakuar nga to me qellim të vetëm ruajtjen e jetës se tyre. Të njëjtit ende nuk janë lejuar te kthehen ne shtëpitë e tyre, pasi qe rreziku ende nuk ka kaluar, andaj kërkojmë mirëkuptim nga ana e tyre”, ka njoftuar policia.
Po ashtu, policia ka kërkuar nga qytetarët që të shmangin ndezjen e zjarreve në natyrë.
“Apelojmë të të gjithë qytetaret të cilët frekuentojnë zonat malore të rajonit të Pejës, e ne veçanti Bjeshkët e Nemuna që maksimalisht të jen te kujdesshëm dhe të përmbahen çdo sendi që mund të aktivizoji zjarre gjatë përdorimit si (shkrepsa, cigare, grilla, zjarre në natyrë etj.) Policia e Kosovës kërkon nga qytetarët të jen të kujdesshëm dhe shmangin ndezjen e zjarreve dhe të raportojnë apo lajmërojnë PK-së për çdo person të dyshuar që mund të jetë i përfshirë në raste të zjarr vënieve”, njofton policia.
