Udhëheqësit e Nëntëshes së Bukureshtit (B9) dhe aleatëve nordikë të NATO-s thanë të mërkurën se Rusia mbetet “kërcënimi më i rrezikshëm, afatgjatë dhe i drejtpërdrejtë” i aleancës, duke theksuar nevojën për të përforcuar qëndrimin e mbrojtjes kolektive të NATO-s përgjatë krahut të saj lindor.
Në një deklaratë të përbashkët të lëshuar pas samitit në Bukuresht, udhëheqësit thanë: “Rusia është dhe do të mbetet kërcënimi më i rëndësishëm, afatgjatë dhe i drejtpërdrejtë për sigurinë e aleatëve.”
Në deklaratë tutje thuhet se NATO “duhet të përqendrohet në detyrën thelbësore të mbrojtjes kolektive, duke përfshirë edhe një qëndrim të fuqishëm mbrojtës përpara” në dritën e mjedisit aktual të sigurisë.
Takimi mblodhi së bashku udhëheqës nga grupi B9 dhe aleatët nordikë, së bashku me Sekretarin e Përgjithshëm të NATO-s Mark Rutte dhe Presidentin ukrainas Volodymyr Zelensky.
ShBA-të gjithashtu morën pjesë si vëzhguese.
Udhëheqësit thanë se aleatët po rrisin investimet në mbrojtje dhe përpjekjet për ndarjen e barrës, ndërsa anëtarët e NATO-s punojnë drejt një objektivi për të shpenzuar 5% të produktit të brendshëm bruto për mbrojtje.
Ata gjithashtu u zotuan të forcojnë lëvizshmërinë ushtarake, sistemet e mbrojtjes nga raketat dhe infrastrukturën e NATO-s në krahun lindor, duke përfshirë zgjerimin e sistemit të tubacionit të karburantit të aleancës.
Grupi gjithashtu riafirmoi mbështetjen për sovranitetin dhe integritetin territorial të Ukrainës, ndërsa mbështeti aspiratat euroatlantike të Kievit dhe ndihmën e vazhdueshme ushtarake.
“Ne riafirmojmë fuqimisht mbështetjen tonë të palëkundur për Ukrainën”, thuhet në deklaratë, duke shtuar se mbështetja për Kievin është gjithashtu “një investim në sigurinë tonë”.
Udhëheqësit shprehën gjithashtu mbështetje për përpjekjet e vazhdueshme të paqes të udhëhequra nga SHBA-të në lidhje me Ukrainën dhe bënë thirrje për rritje të presionit mbi Rusinë që të angazhohet në negociata për t’i dhënë fund luftës.
Ata shprehën gjithashtu shqetësim për zhvillimet në Lindjen e Mesme dhe mbështetën përpjekjet për të mbrojtur lirinë e lundrimit në Ngushticën e Hormuzit.
Samiti i ardhshëm i B9 dhe aleatëve nordikë do të zhvillohet në Poloni.
