Elon Musk, CEO i Tesla, mund të bëhet personi i parë në botë me pasuri mbi 1 trilion dollarë falë kompanisë së tij SpaceX, beson analisti Morgan Stanley. Musk është tashmë njeriu më i pasur në botë me pasuri në vlerë 241 miliardë dollarë.
Ai i detyrohet shumicës së kësaj kompanisë së tij, Tesla, e cila prodhon makina elektrike, por falë rritjes së SpaceX në eksplorimin e hapësirës dhe turizmit hapësinor, është vetëm çështje kohe para se të bëhet i pari në botë me pasuri mbi 1 trilion dollarë.
Analisti i Morgan Stanley, Adam Jones tha se që nga fillimi i tij në 2002, SpaceX ka shtyrë kufijtë dhe afatet e mundshme, kur bëhet fjalë për raketa, automjete lëshimi dhe infrastrukturë.
“Më shumë klientë thonë se nëse Elon Musk bëhet triliarderi i parë, nuk do të jetë për shkak të Teslës. Të tjerë thonë se SpaceX mund të bëhet përfundimisht kompania më e vlefshme në botë, në çdo sektor të industrisë”, tha Jones në analizën e tij ‘Shpejtësia e arratisjes së SpaceX … Kush mund t’i kapë ata?’.
SpaceX vlen 200 miliardë dollarë
SpaceX ka transformuar mënyrën se si bota e sheh eksplorimin e hapësirës. Fluturimet në hapësirë, të cilat kanë qenë një gjë e rrallë deri më tani dhe për të cilat u desh një kohë e gjatë për t’u përgatitur dhe patur shumë fat, janë bërë një tjetër argëtim për të pasurit dhe me ndikimin në muajt e fundit. Kjo është kryesisht për shkak të SpaceX, sepse kjo kompani ishte e para që doli me idenë e raketave që mund të përdoren shumë herë.
Raketa të tilla tashmë pothuajse janë bërë realitet, kështu që kostoja e fluturimeve në hapësirë është dukshëm më e ulët, brenda buxhetit të më të pasurve.
Jones beson se SpaceX mund të jetë një lider në shumë fusha, pavarësisht nëse është infrastruktura hapësinore, eksplorimi i hapësirës së thellë ose vëzhgimi i Tokës.
Projekti i internetit satelitor Starlink do të jetë gjithashtu çelësi për rritjen e kompanisë. Jones vlerëson se SpaceX vlen 200 miliardë dollarë. Musk zotëron 48 përqind të kompanisë. / Gazeta Enigma.
