Njohës i çështjeve të arsimit, Rinor Qehaja, ka thënë se vendimi i fundit i Qeverisë për rikthimin e nxënësve në shkolla është i mirëpritur, ndërkaq ka folur edhe rreth idesë për eliminimin e vlerësimit të nxënësve nga klasa e parë deri në të pestën me anë të notave.
Ai ka thënë se lidhur me këtë duhet debat publik me shumë të përfshirë për të parë benefitet. Ndryshe, ditë më parë ministrja e Arsimit dhe Shkencës, Arbërie Nagavci, ka bërë të ditur se e ka në plan që të largojë notimin e nxënësve me nota 1 deri në 5.
“Vazhdimisht kemi avokuar për rikthim me prezencë fizike në shkolla. Ka qenë vendim i mirë dhe i mirëpritur. E tash po avokojmë për një përkushtim më të madh të institucioneve që të plotësohet me mësim plotësuar orët e humbura gjatë pandemisë COVID-19”, tha ai.
Ai foli edhe për mësimin online, “Të ekspozuarit vetëm ndaj internetit dhe teknologjisë informative s’do të thotë që nga të gjithë përdoret në mënyrën e duhur. Duket që përdorimi i internetit si mjet mësimor gjatë pandemisë ka qenë i vogël. Dhe kjo e ka vënë në pikëpyetje edhe mësimin online”, ka thënë Qehaja në emisionin e mëngjesit në RTV Dukagjini.
I pyetur për idenë e eliminimit të vlerësimit të nxënësve me anë të notave, Qehaja tha: “Ky ka qenë një premtim elektoral. Vlerësojmë meqë është reformë jashtëzakonisht e thellë kurrikulare, pikë së pari nevojitet një debat publik me shumë të përfshirë për të parë benefitet. Është praktikë e mirë e vendeve perëndimore por duhet t’i përshtatemi sistemit tonë arsimore. Frika jonë është që eventualisht me eliminimin e vlerësimit diferencial, mësim nxënësia do të kthehet në neglizhencë”.
