Blerim Vela, shef i stafit në kabinetin e presidentes Vjosa Osmani, ka reaguar pas kritikave të opozitës drejtuar Osmanit, se ajo është izoluar, raporton Gazeta “Enigma”.
Ai tha se Vjosa Osmani ka pasur komunikim edhe me presidentin e Shteteve të Bashkuara të Amerikës Joe Biden dhe zëvendëspresidenten Kamala Harris.
“Tendenca e ca figurave opozitare për krijimin e narrativit për gjoja izolimin e Presidentes janë të pabaza. Presidentja nga prilli ka realizuar mbi 30 takime me homolog të saj. Në raport me SHBA, mes tjerash, ka pasur komunikim me Presidentin Biden e ka biseduar me VP Harris”.
Shefi i stafit të presidentes theksoi se si rezultat i partneritetit me SHBA-të janë siguruar mbi 500 mijë vaksina.
“Si rezultat i partneritetit të tillë me SHBA janë siguruar mbi 500 mijë vaksina, është përcjell video adresimi personal i Presidentit Biden dhe është realizuar strehimi i përkohshëm i refugjatëve afgane”.
“Të gjitha këto janë realizuar pa shtyer ide për copëtimin e Kosovës”, theksoi Vela. / Gazeta Enigma.
