Ambasadori i Shteteve të Bashkuara të Amerikës në Serbi, Christopher Hill, ka thënë se Qeveria e Kosovës e ka shumicën e fajit që nuk ka pasur progres në dialog.
Në një intervistë për Radiotelevizionin serb të premten vonë, Hill u shpreh se Kosova duhej të bënte disa gjëra për mbrojtjen e komuniteteve, gjë që sipas tij, nuk i ka bërë.
“Kjo ka qenë sfidë e vërtetë. Kosova duhej të bënte disa gjëra, duke përfshirë mbrojtjen e komuniteteve të ndryshme, duke përfshirë popullatën serbe. Personalisht, progresi në Kosovë më duket shumë zhgënjyes”, ka thënë Hill kur u pyet se a ka dështuar SHBA-ja të sigurojë jetë dinjitoze për serbët në Kosovë.
“Shpresoj për më shumë përpjekje në dialog, veçanërisht në dialogun e Brukselit të udhëhequr nga evropianët. Shumë prej nesh janë të zhgënjyer nga mungesa e progresit, dhe për mendimin tim, shumica e fajit i takon Qeverisë së Kosovës”, ka shtuar ai në intervistën lamtumirëse.
Pas inaugurimit të Donald Trumpi si president i 47-të i SHBA-së më 20 janar, Hillit i përfundon mandati si ambasador në Beograd. Ai e mori postin në marsin e vitit 2022. Herë pas here, ka qenë zë kritik për Kosovën.
