Carlo Ancelotti ka hedhur poshtë pretendimet se Real Madridi u poshtërua nga Barcelona në Superkupën e Spanjës, ku u mposht me rezultat 1-3.
Ancelotti potencoi se humbën një ndeshje ndaj Barcelonës, ashtu siç e fituan një kundër tyre në La Liga.
“Të thuash se ky ishte një poshtërim sportiv është mungesë respekti. Ne humbëm një ndeshje me Barcelonën, ashtu siç fituam një ndeshje kundër tyre në La Liga. Barcelona ishte më e mirë. Kjo është. Të thuash poshtërim, kjo është shumë. Në sport herë fiton, herë fiton kundërshtari”, tha Ancelotti.
“Nuk është një situatë kritike, por është një situatë e vështirë. Ju keni momente të vështira në një sezon dhe ne duhet ta rregullojmë këtë së shpejti me përkushtim. Kur pëson tre gola, duhet të jesh më i mirë në mbrojtje. Duhet të punojmë për këtë. Nuk po luajmë mirë tani. Por, ky ekip ka cilësinë për të qenë konkurrues në të gjitha turnetë që na kanë mbetur. Real Madridi zakonisht fiton finalet, dhe ne e kemi humbur këtë, por na mbetet një sezon i gjatë.”
Reali fitoi La Ligën dhe Ligën e Kampionëve nën drejtimin e Ancelottit në sezonin 2021-2022.
