Kombëtarja e Kosovës e ka zhvilluar sot stërvitjen e fundit para ndeshjes së nesërme miqësore me Guinenë. Në këtë ndeshje Dardanët do të paraqiten me futbollistë që shihen si potencial për ekipin në tw ardhmen.
Gjatë kësaj stërvitje përzgjedhësi Challandes është përqendruar kryesisht në aspektin tekniko-taktik, duke u shpjeguar futbollistëve elemente dhe skema të ndryshme të lojës. Edhe gjatë stërvitjes së sotme atmosfera tek futbollistët dardanë ishte shumë e mirë, ashtu sikurse edhe harmonia brenda ekipit.
Pas stërvitjes opinionet e tyre para miqësores me Guinenë i dhanë përzgjedhësi Challandes, si dhe futbollistët Armend Thaqi e Bajram Jashanica. Ata vlerësuan se këto tri ditë të përgatitjeve i kanë shërbyer ekipit për t’u njohur më mirë me njëri-tjetrin, teksa e vlerësuan Guinenë si një kundërshtar shumë të fortë si fizikisht ashtu edhe në aspektin taktik, gjë të cilën e dëshmuan në miqësoren e fundit kundër Turqisë.
Deklarata e përzgjedhësit Challandes pas stërvitjes:
“E kemi nisur këtë kamp stërvitur për dy ndeshjet e radhës, me një ekip krejtësisht të ri. Nuk ishte aspak lehtë të gjenim lojtarët për këto ndeshje në këtë kohë. Disa lojtarë në pushim, disa e kanë përfunduar kampionatin para tri javësh. Kemi lojtarë me U21, kurse disa të tjerë që po përgatiten me ekipet e tyre për kupat evropiane. Nuk ishte aspak lehtë të ndërtojmë një ekip. Por, jam shumë i lumtur që lojtarët po ndiejnë kënaqësi që janë këtu”, tha Challandes.
Ai ka shtuar se lojtarët kanë bërë punë të mirë gjatë kësaj periudhe përgatitore, dhe kanë treguar mentalitet të mirë.
“Ky ekip kurrë nuk ka luajtur së bashku, nuk është lehtë të gjendet lidhja menjëherë. Por, janë lojtarë të ri dhe ata janë të mirë dhe ne jemi munduar të bëjmë më të mirën me tri stërvitje. Do të luajmë kundër dy ekipeve të forta nga Afrika. Guinea është në Top 20 në Afrikë dhe ka luajtur ndeshje të mirë me Turqinë 0:0.
Chalandes ka folur edhe për ekipet kundërshtare dhe sfidat që pritet t’i ketë Kosova.
“Kundërshtar i fortë, fizikisht, teknikisht e taktikisht. Për lojtarët tanë të rinj është një përvojë e vështirë, por ne mund të mësojmë nga situatat e tilla. Do të jetë mirë t’i shohim lojtarët në situata të tilla dhe të japim një përgjigje si ekip sepse individualisht nuk është aspak e lehtë. Shpresoj që ekipi të luftojë, të tregohet si kundërshtar i fortë. Jam paska i frikësuar, por edhe i kënaqur. Kemi lojtarë të rinj për të ardhmen, të cilët do t’i shohim.
Strategu i ekipit përfaqësues të Kosovës ka sqaruar edhe raportet e tij dhe afërsinë me lojtarët, të cilëve tha se u ka sqaruar për mundësitë që mund t’u ofrohen bazuar në paraqitjet e tyre, sidomos në këtë periudhë kur po zhvillohen takime të shumëta miqësore, të cilat janë në vëzhgim të menaxherëve të shumtë, në prag të edicionit të ardhshëm 2021/2022.
“Ju kam thënë se duhet të luajnë për ekipin dhe për të ardhmen e tyre. Do të ketë shumë skautë këtu dhe ndoshta mund ta shohin një lojtarë nga Kosova. Pishman jam vetëm për kohën sepse ishte e vështirë të gjenden lojtarët në formë fizike menjëherë pas pushimeve. Ndeshjet e forta fizike mund të jenë të rrezikshme, por ne jemi munduar të bëjmë përgatitjet e duhura për këto dy ndeshje. Besoj se jemi të gatshëm dhe këtë do ta tregojmë në fushë”, tha Chalandes.
