Një gjykatë në Stamboll ka dënuar me mbi 11,000 vite burg Faruk Fatih Ozer, i cili akuzohet si kreu i Crypto Exchange Thodex për krime të shumta përfshirë mashtrimin, udhëheqjen e një organizate kriminale dhe pastrim parash.
Vendimi u dha nga gjykata turke, shkruajnë mediat e huaja, ndërsa thekohet se u dënuan edhe dy vëllezërit e motrat e tij me burg, duke i shpallur ata fajtorë për mashtrim të rëndë.
“Unë jam mjaft i zgjuar për të udhëhequr çdo institucion në Tokë. Kjo është e dukshme në këtë kompani që kam krijuar në moshën 22-vjeçare. Nuk do të kisha vepruar kaq amator nëse kjo do të ishte një organizatë kriminale”, ka thënë ai në dëshminë para togave të zeza.
Kujtojmë se i riu turk ishte shpallur në kërkim ndërkombëtar, pasi Gjykata e Lartë e Stambollit në vitin 2021, kishte lëshuar urdhër arresti ndaj tij, për veprat penale “Krijimi i organizatës kriminale” dhe “Mashtrimi me pasoja të rënda”.
Ai akuzohet për mashtrim të 391 000 qytetarëve, nëpërmjet kriptomonedhave, mashtrim me dëm ekonomik 2 miliardë dollarë.
Ozer u arrestua në 30 gusht në Shqipëri. Që prej vitit të kaluar nga autoritetet turke u kërkua arrestimi i 28 vjeçarit, i cili ishte filmuar nga kamerat e aeroportit të Rinasit, gjithashtu edhe nga kamerat e disa hoteleve në Tiranë, por më pas humbi gjurmët, duke u kthyer në një nga personat më të kërkuar.
