Deputeti i Lëvizjes Vetëvendosje, Artan Abrashi, ka thënë se vendosja e refugjatëve në kampin e KFOR-it gjerman në Prizren është e gabuar, shkruan Gazeta Metro.
Sipas Abrashit vendosja e refugjatëve afganë në ish kampin e KFORit gjerman në Prizren, siç përflitet, është ide e gabuar.
Ai ka thënë se ai vend është destinuar si Qendër e Inovacionit dhe Trajnimeve.
Postimi i plotë i Abrashit:
Refugjatët afganë janë të mirëseardhur sikurse çdo kombësi e përndjekur.
Por vendosja e tyre në ish kampin e KFORit gjerman në Prizren, siç përflitet, është ide e gabuar.
Ai vend tashmë është destinuar si Qendër e Inovacionit dhe Trajnimeve.
Më kryesorja, përqendrimi i një numri të madh të njerëzve aty nuk do të mundësoj kushte të mira për refugjatët.
Izolimi do të bëhej i pashmangshëm dhe kjo gjë nuk është humane.
Të shqyrtohet ndonjë lokacion tjetër.
Në anën tjetër, turma të mëdha njerëzish janë mbledhur në aeroportin e Kabulit që nga e diela, duke kërkuar shpresë për t’u larguar nga vendi, pas rimarrjes së territorit nga forcat talebane.
BBC-ja ka publikuar pamje nga sateliti, se si aeroporti dhe rrugët e Kabulit janë të bllokuara nga qytetarët. Këta të fundit kanë deklaruar se janë pa shpresë dhe se perëndimi i ka lënë në mëshirë të fatit.
