Avokati i shoferit kosovar i cili shkaktoi aksidentin me autobus në Kroaci, ku humbën jetën 10 persona dhe 45 të tjerë u lënduan, Igor Cishper, deklaroi se paraburgimi i klientit të tij u zgjat edhe për dy muaj të tjerë për shkak të mundësisë së arratisjes.
“Paraburgimi i klientit tim u zgjat për dy muaj të tjerë për shkak të mundësisë së arratisjes. Komunikoj me të, ai nuk është mirë me shëndet. Është në gjendje shumë të keqe”, tha avokati i tij.
“Ne ofruam garanci prej 100,000 kuna (66.000 euro), por gjykata nuk e pranoi atë. Klienti im bisedon me familjen e tij në Kosovë çdo ditë, por nuk është aspak mirë. Dhe në bazë të situatës, është e vështirë”, tha Cishper dhe shtoi se ata janë duke pritur për një ekspertizë të trafikut në mënyrë që të vërtetojnë faktet.
Kujtojmë se atë mëngjes fatal të së dielës në orën 6.20 të mëngjesit në autostradën pranë Slavonski Brod, një autobus i Kosovës doli nga rruga. Kishte 69 persona në autobus, 67 pasagjerë dhe dy shoferë, kryesisht shtetas të Kosovës në punë në Gjermani, që udhëtonin nga Frankfurti në Prishtinë për pushime.
Dhjetë persona vdiqën, 45 u plagosën, 15 prej tyre rëndë dhe 30 persona u plagosën lehtë. Mes të vdekurve ishte një nënë dhe një vajzë, por edhe një nënë e pesë fëmijëve. Një tjetër shofer autobusi, babai i tre djemve, u vra në aksident.
