Ministri i Bujqësisë, Pylltarisë dhe Zhvillimit Rural, Faton Peci bashkë me Ministrin e Bujqësisë, Pylltarisë dhe Ekonomisë së Ujërave të Republikës së Maqedonisë së Veriut nënshkruan sot gjatë ditës Memorandumin e Bashkëpunimit mes dy vendeve, gjatë vizitës zyrtare të Ministrit Faton Peci në shtetin fqinj.
Ky memorandum ka për synim inkurajimin e mëtutjeshëm të zhvillimit të marrëdhënieve të mira dhe forcimin e vazhdimësisë së bashkëpunimit në fushën e interesit të përbashkët në lidhje me procesin e para–anëtarësimit në Bashkimin Evropian të të dyja vendeve fqinje.
Në kuadër të këtij Memorandumi të Bashkëpunimit palët do të bashkëpunojnë ngushtë me qëllim të arritjes së progresit në aktivitete që lidhen me Integrimin Evropian në fushën e bujqësisë dhe zhvillimit rural, veçanërisht në harmonizimin e legjislacionit të brendshëm me atë të BE-së, forcimin e strukturës institucionale përmes ngritjes së kapaciteteve institucionale në institucionet përkatëse, koordinimin e ndihmës së donatorëve në lidhje me përdorimin më të mirë të instrumenteve financiare të BE-së, plotësimin e kritereve sipas standardeve të IPARD, shkëmbimin e informacioneve në lidhje me proceset e BE–së në fushën e bujqësisë dhe zhvillimit rural, zbatimin e konsultimeve, nismave dhe aktiviteteve të përbashkëta në inkurajimin e arritjeve të të dyja palëve në fushat e përdorimit më të mirë të instrumentit financiar të para–anëtarësimit për zhvillimin rural, etj.
Koordinimi për realizimin e bashkëpunimit mes palëve për sektorët e listuar më lartë do të realizohet përmes mjeteve dhe metodave, siç janë organizimi i përbashkët i takimeve, konferencave, tryezave, panaireve, seminareve, nismave të përbashkëta në avancimin e sektorit të bujqësisë dhe zhvillimit rural me interes të ndërsjelltë.
Vlen të theksohet se Memorandumi në fjalë u nënshkrua gjatë seancës së parë të përbashkët të dy qeverive, kosovare dhe asaj maqedonase e cila u mbajt sot në Shkup.
