Ministrja e Punëve të Jashtme dhe Diasporës, Donika Gërvalla ka folur rreth Milan Radoiçiq.
Ajo ka deklaruar se terroristi Radoiçiq është përzënë nga Kosova nga qeveria aktuale.
Gjatë një tubimi të “Guxo”, kryetarja e këtij subjekti politik ka thënë se Qeveria Kurti është kujdesur që Radoiçiq të izolohet në Serbi dhe të jetë nën kërkim ndërkombëtar.
“Më lejoni të përmend disa fakte, me qeveritë e partive të tjera, Radoiçiq dhe të tjerët si ai, pritnin për t’u bërë ortakë në qeveri dhe biznes, priteshin në shtëpi dhe zyre si mysafirë, organizonin të papenguar rrjetin e sofistikuar të të gjitha llojeve të krimit të organizuar dhe rrihnin për pikë të qejfit qytetarët e pafajshëm, madje edhe zyrtarët policorë, por edhe zyrtarë të institucioneve tona. Të kalojmë në vitin 2024, si është sjell kjo qeveri me Radoiçiq dhe të tjerët si ai. E kemi mundur në Banjskë, e kemi përzënë nga Kosova, i kemi konfiskuar asetet e tij ekonomike, ja kemi konfiskuar vilën, veturat dhe gjitha të tjerat, e kemi izoluar në Serbi, jemi kujdesur që të hyjë në lista të zeza, dhe që ai të jetë në listën e Interpolit me ngjyrë të kuqe në kërkim”, ka deklaruar Gërvalla.
Tutje Gërvalla ka shtuar të dielën se Qeveria Kurti ua ka ndërprerë Radoiçiqit dhe të tjerëve rrugët e kontrabandës. /Gazeta Enigma
Gërvalla për Radoiçiqin: Ne e mposhtëm dhe e përzumë nga Kosova
