Një ngjarje e rëndë ka ndodhur sot në rrugën “UÇK” në Gjakovë, ku dy të mitur janë përfshirë në një përleshje fizike.
Sipas zëdhënësit të Policisë së Kosovës për Rajonin e Gjakovës, Sheremet Elezaj, dy të miturit janë dërguar në spital për shkak të lëndimeve që kanë marrë, e të cilat dyshohet se u shkaktuan nga goditja me thikë.
Elezaj njoftoi se është arrestuar një person i dyshuar.
“Sot rreth orës 11:25 dy persona (meshkuj të mitur) pasi dyshohet se ishin përfshirë në një përleshje fizike në rrugën “UÇK” në Gjakovë, janë dërguar në Spitalin Rajonal për shkak të lëndimeve (dyshohet nga mjet i mprehtë-thikë). Policia ka dalë në vendin e ngjarjes si dhe është njoftuar prokurori i shtetit. Është bërë egzaminimi i vendit të ngjarjes si dhe është arrestuar një i dyshuar”, tha Elezaj.
