Policia italiane ka gjetur trupin e pajetë të Ilaria Sulës, 22-vjeçares shqiptare që ishte zhdukur më 25 mars në Romë. Ajo po kërkohej tash e një javë.
Sipas burimeve të mediave italiane, trupi i saj u gjet mëngjesin e së mërkurës në një zonë të pyllëzuar pranë komunës së Polit, në periferi të Romës. Viktima ishte futur në një valixhe dhe ishte hedhur në fund të një gremine.
Ilaria, e cila jetonte në lagjen Furio Camillo të kryeqytetit italian, ishte studente në Universitetin e La Sapienza-s. Mbrëmjen e natës kur ajo humbi, kishte shkëmbyer disa mesazhe me shoqet e saj në WhatsApp, të cilat u shqetësuan kur ajo nuk u kthye në shtëpi. Pas këtij momenti, telefoni i saj mbeti i fikur.
Pas denoncimit nga familja dhe shoqet e Ilarias në komisariatin e San Lorenzos, nisën hetimet për zbardhjen e rastit.
Hetuesit italianë janë të fokusuar tek një pistë ku dyshimet janë për ish-të dashurin e 22-vjeçares, një shtetas nga Filipinet. Policia po punon intensivisht për të zbardhur ngjarjen dhe për të kapur autorët e krimit.
