Presidenti i Shteteve të Bashkuara të Amerikës, Donald Trump, ka njoftuar vendosjen e tarifave të reja ndaj partnerëve tregtarë të SHBA-së, përfshirë edhe Kosovën, raporton Gazeta Enigma. Ndonëse tarifa ndaj Kosovës është minimalja krahasuar me vendet e rajonit prej 10 %, vlerësohet se e njëjta do ta dëmtoj ekonominë e brishtë të vendit.
E, rreth kësaj ka reaguar edhe presidentja Vjosa Osmani, e cila ka kërkuar Qeverisë së Kosovës që të pezullojë tarifat e importit për të gjitha produktet nga Shtetet e Bashkuara të Amerikës (SHBA).
Në një postim në platformën X, Vjosa Osmani ka theksuar se ky hap do të forcojë marrëdhëniet ekonomike me aleatin më të afërt të Kosovës dhe do të dërgojë një mesazh të qartë për gatishmërinë e vendit drejt një partneriteti më të fuqishëm me SHBA-në.
Edhe kryetari i Aleancës për Ardhmërinë e Kosovës, Ramush Haradinaj i është bashkuar thirrjes.
“Hiqni çdo taksë ndaj SHBA-së”, ka shkruar Haradinaj në Facebook. / Gazeta Enigma.
