Anglia ka kaluar në finalen e madhe të Kampionatit Evropian ‘Euro 2020’ pas fitores ndaj Danimarkës në gjysmëfinale.
Anglezët u desh të djersitën shumë për ta marrë fitoren 2-1 pas kohës shtesë. E për fitoren e madhe në gjysmëfinale ka folur edhe kapiteni i ‘Tre Luanëve’, Harry Kane i cili shënoi golin e fitores.
“Është diçka e pabesueshme. Po çfarë ndeshjeje! Komplimente Danimarkës. Kërkuam megjithatë fitoren deri në fund dhe arritëm të shënonim në momentin e duhur. Reaguam shumë mirë. E tani jemi në finale në shtëpi, çfarë ndjesie”, deklaroi fillimisht Kane.
“Për fat të mirë, gjithçka shkoi në favorin tonë këtë herë. Arritëm të përgjigjemi mirë pas avantazhit të tyre dhe nisëm të kontrollojmë lojën”, vazhdoi tutje anglezi.
Tutje kapiteni i ‘Tre Luanëve’ foli edhe për penalltinë që e humbi, por për fat të mirë të tij shënoi nga topi i kthyer.
“Zgjodha që në fillim krahun se ku do të godisja, të them të vërtetën nuk është penalltia më e mirë që kam goditur. Ndonjëherë e humbet dhe topi të afrohet sërish dhe për fat të mirë ndodhi ndaj Danimarkës”, tha Kane.
Tutje sulmuesi anglez foli edhe për finalen e madhe ndaj Italisë, ku pret një ndeshje të vështirë.
“E dimë që na pret një ndeshje e ndërlikuar ndaj Italisë. Kemi zhvilluar një turne të madh deri tani. Na pret edhe një ndeshje për të rikthyer trofeun në shtëpi dhe po e presim me padurim”, tha Kane.
