Interi është treguar bindës në udhëtim te Hellas Verona (6-0) për të ruajtur pozitën e katërt në renditjen tabelare.
Rezultati u zhbllokua në minutën e 31-të me një autogol të Adolfo Gaich. Nuk vonoi shumë dhe Hakan Calhanoglu e dyfishoi epërsinë (36’) i asistuar nga Marcelo Brozovic.
Një minutë më pas (37’), Edin Dzeko e shënoi edhe golin e tretë falë asistimit nga Lautaro Martinez duke dërguar skuadrën e tij me epërsi të lartë në pushim.
Edhe në gjysmën e dytë, Nerazzurrët vazhduan të luanin më mirë duke e gjetur rrjetën në minutën e 55-të me golin e Lautaros.
Dzeko shënoi edhe golin e dytë personal në këtë takim (61’), falë asistimit nga Francesco Acerbi. Golin e dytë personal e realizoi edhe Lautaro (90’+2) për ta vendosur rezultatin përfundimtar 6-0.
Falë kësaj fitoreje, Interi është ngritur në kuotën e 60 pikëve, ndërsa gara për top katërshe vazhdon të jetë shumë e ngushtë me disa skuadra të përfshira.
Hellas Verona mbetet në zonën e rrezikut për të rënë nga elita e futbollit italian dhe do të përpiqet në ndeshjet e mbetura që të largohet nga kjo pjesë e tabelës.
