Më 25 nëntor ka nisur fushata 16 ditore të aktivizmit kundër Dhunës me Bazë Gjinore, e cila synon realizmin e aktiviteteve të ndryshme me qëllim parandalimin e dhunës dhe trajtimin e rasteve me seriozitet.
Me sloganin ‘Sot dhe çdo ditë tjetër!’, institucionet janë zotuar për përkushtim maksimal për eliminimin e dhunës ndaj grave dhe vajzave.
Pavarësisht kësaj, gjatë këtyre ditëve janë raportuar me dhjetëra raste të dhunës në familje.
Një rast i tillë u raportua gjatë ditës së djeshme në fshatin Koretin të Kamenicës,ku një person [emër i njohur për redaksinë, por që për hir të ruajtjes së privatësisë së viktimave, nuk publikohet identiteti] dyshohet se ka kërcënuar me jetë bashkëshorten dhe vajzën e tij.
Burimet e Gazetës Sinjali brenda Prokurorisë kanë zbardhur detaje nga ngjarja e rëndë, ku kryefamiljari pas akuzave ndaj bashkëshortes së tij, se po e tradhton me dhëndrin, dyshohet se me armë zjarri ka kërcënuar vajzën 26-vjeçare dhe mikun e tij.
Bazuar në dëshminë e viktimave, në rast kanë ndërhyrë nëna e e 26-vjeçares dhe vëllai i saj, të cilët kanë parandaluar ngjarjen që mund të shndërrohej në tragjedi.
Si rezultat i denoncimit, njësitë policore kanë arritur që ta arrestojnë të dyshuarin, i cili gjatë intervistimit nga organet e hetuesisë ka pranuar se posedon armë ilegale.
Sipas njoftimit të Policisë, 62-vjeçarit i janë gjetur dhe sekuestruar armët pa leje si në vijim:
- Një (1) pushkë automatike e llojit AK 47,
- Dy (2) karikator të pushkë automatike,
- Njëqind e pesëdhjetë e tre (153) fishekë të kalibrit 7.62×39 mm
- Një (1) pistoletë të llojit M57 e kalibrit 7.62
- Dy (2) karikator të pistoletës dhe
- Tredhjet e një (31) fishekë të kalibrit 7.62 mm
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor. I njëjti do të hetohet nën dyshimet për kryerjen e dy veprave penale ‘Dhunë në familje’ dhe ‘Mbajtje në pronësi, kontroll ose posedim të paautorizuar të armës’.
Kujtojmë që dhuna në familje në shumë raste ka përfunduar edhe me fatalitet.
Lista me emrat e grave të vrara nga bashkëshortët e tyre, zgjatet nga viti në vit.
E, për këtë shumë shpesh janë fajësuar edhe institucionet e drejtësisë, për shkak se sipas raportimeve ndër vite, të gjitha viktimat, më parë kanë denoncuar dhunën ndaj tyre, mirëpo thirrja e tyre për ndihmë kishte hasur në vesh të shurdhër.
Rastet makabre të vrasjeve ndaj grave në të shumtën e rasteve janë përcjellë me protesta të shumta nga qytetarët e revoltuar.
