Kryetari i Drenasit, Ramiz Lladrovci, në katër vjetorin e arrestimit të ish-krerëve të UÇK-së ka deklaruar se më shumë se kurrë, Kosovës sot i mungojnë bijtë e saj më besnikë e dalëzotës, raporton Gazeta “Enigma”.
Përmes një postimi në profilin e tij në Facebook ka deklaruar se orteku që do ta dërgojë në shtëpi këtë Qeveri, tashmë është nisur.
“Më shumë se kurrë, Kosovës sot i mungojnë bijtë e saj më besnikë e dalëzotës. Për këto katër vjet, vendi u qeveris nga keqbërës e keqpërdorues masiv të besimit qytetar, të institucioneve dhe të parasë publike. Orteku që do ta dërgojë në shtëpi këtë Qeveri, tashmë është nisur. Paaftësia në qeverisje, shkeljet e ligjit, korrupsioni, mosmirëmbajtja e aleancave tona jetike dhe degradimi i shtetit marrin fund më 9 shkurt 2025”, ka shkruar tutje Lladrovci.
Tutje ai ka shtuar se Kosova do të zgjedh më meritorët për ta udhëhequr mandatin e ardhshëm, pa afera, pa shkelje të Kushtetutës dhe pa komplekse inferioriteti, me besim në forcat pozitive të Kosovës bashkë me aleatët brenda vlerave të arritura demokratike me mund e përkushtim.
“Bedri Hamza si kryeministër pres ta ndalojë degradimin dhe ta kthej Kosovën në rrugë të mbarë, ndërsa heronjtë tanë të luftës dhe paqes do të marrin ndihmën e Shtetit dhe Qeverisë me kushtet e duhura për mbrojtjen meritore. Gati për ndryshim!”, tha ai. /Gazeta Enigma/
