Klubi i basketbollit, Prishtina, ka akuzuar Federatën e Basketbollit të Kosovës se ka bashkëpunuar me Trepçën për ta caktuar orarin e ndeshjes së pestë gjysmëfinale në kundërshtim me Propozicionet e Garave. Ata madje kanë thënë se me gjykimin e dy ndeshjeve të fundit nga gjyqtarët vendorë ka rënë automatikisht dakordimi i klubeve që të ketë gjyqtarë të huaj.
FBK-ja ka njoftuar të martën se ka vendosur ta caktojë të dielën si ditën e ndeshjes të gjysmëfinales vendimtare mes Prishtinës dhe Trepçës. Seria është 2:2. Ndeshja ishte planifikuar të luhej të enjten, por për shkak që Kosova në hendboll do të luajë në Pallatin e Rinisë dhe Sporteve, ndeshja duhej shtyrë. FBK-ja ka paralajmëruar se edhe në ndeshjet e mbetura do të ketë gjyqtarë të huaj.
Prishtina përmes një komunikate të martën mbrëma ka thënë se parregullsitë, kurdisjet, ryshfeti dhe presion nuk kanë të ndalur, duke hedhur akuza drejt FBK-së dhe Trepçës.
“Parregullsitë, kurdisjet, ryshfeti e presionet nuk kanë të ndalur dhe si vazhdimsi e kësaj klike keqbërësish, ju njoftojmë se FBK në koordinim të plotë me KB Trepca e në kundërshtim flagrant me rregulloret e vetë Federatës kanë lajmëruar arbitrarisht për termin të ndeshjes së pestë në kundërshtim me Propozicionet e Garave”, thuhet në reagim.
Prishtina ka thënë se ka kërkuar që ndeshja të zhvillohej të mërkurën ose të premten, por sipas tyre, është hera e parë në histori të basketbollit kosovar që kundërshtohet një kërkesë legjitime me arsye objektive.
“Për shkak të pamundësisë së zhvillimit të ndeshjes të enjten në mungesë të orarit në palestër si rezultat i ndeshjes ndërkombëtare të hendbollit mes Kosovës dhe Malit të Zi, kemi kërkuar që ndeshja të zhvillohet ose të mërkurën ose të premten pra 24 orë më herët ose më vonë, dhe është hera e parë në histori të basketbollit të Kosovës që një ekip të kundërshtojë një kërkesë të tillë legjitime me arsye objektive, dhe në dijeni të FBK-së”, thuhet në komunikatën e Prishtinës.
Prishtina ka thënë se caktimi që ndeshja të luhet të dielën nga FBK-ja është kundërshtuar “pasi që është në kundërshtim me të gjitha nenet e Propozicioneve të Garave që rregullojnë çështjen e orarit dhe organizimit të ndeshjes”.
“Kështu që sa i përket Prishtinës dhe Plisave, kudo e kurdo caktojeni, ne jemi të gatshëm”, thuhet në reagim.
