Ministria e Administrimit të Pushtetit Lokal ka refuzuar kërkesën e kryetarit të Gjilanit, Alban Hyseni, për shpërbërjen e Kuvendit Komunal të këtij qyteti.
Lajmi u bë i ditur nga Gentrit Murseli, asamblist i Lidhjes Demokratike të Kosovës (LDK), shkruan Gazeta Enigma.
Murseli tha se zyrtarisht MAPL-ja ka refuzuar shpalljen e zgjedhjeve të reja në organin legjislativ të kësaj komune.
“Kryetar, ky është apel publik! Për hir të qytetarëve, pranoni shqyrtimin e kërkesave të partive opozitare dhe ofroni një zgjidhje për dalje nga kjo situatë që nuk i sjell dobi askujt”, tha Murseli
Murseli potencoi se kjo kërkesë është joligjore.
“Kërkesa joligjore për shpërbërjen e Kuvendit ka vërtetuar dështimin tuaj për zgjidhjen e çështjeve përmes kompromisit. Andaj, reflektoni!”, theksoi ai.
“Sepse interesi i përgjithshëm është më i rëndësishëm sesa kalkulimet tuaja politike”, tha ndër të tjera kuvendari i opozitës./GazetaEnigma/
