Zyra e Kryeminstrit Albin Kurti me një komunikatë për media kanë treguar se shefi i Qeverisë ka mirëpritur sot në Prishtinë të parin e Qeverisë irlandeze, Leo Varadkar.
Sipas ZKM’së, Kurti e ka falënderuar Varadkar që Irlanda e mbështet Kosovën në anëtarësime në mekanizma ndërkombëtare.
Ndërsa kryeministri irlandez ka thënë se shteti i tij vazhdimisht do ta mbështesë Kosovën në procesin eurointegrues dhe anëtarësimin në organizata ndërkombëtare.
Njofitmi nga ZKM:
Me ceremoni shtetërore, u prit sot në Prishtinë, Kryeministri i Irlandës, Leo Varadkar. Kryeministri i Republikës së Kosovës, Albin Kurti, e shoqëroi atë gjatë parakalimit para Gardës Ceremoniale të Forcës së Sigurisë së Kosovës. Së bashku ata zhvilluan një takim tête-à-tête, një takim dypalësh me delegacionet përkatëse dhe në fund mbajtën një konferencë të përbashkët për media.
Kryeministri Kurti u shpreh mirënjohës për vizitën e homologut të tij irlandez Varadkar në fillim të këtij viti të ri.
“Dy vendet tona janë të lidhura për vlerat e përbashkëta dhe një histori të qëndrueshmërisë dhe rezistencës, dhe ne jemi mirënjohës për mbështetjen e palëkundur të Irlandës në çlirimin, pavarësinë dhe zhvillimin e vendit tonë”, u shpreh kryeministri Kurti në fillim të takimit.
Ai falënderoi Irlandën dhe kryeministrin Varadkar për rolin dhe përkrahjen ndaj Kosovës në proceset e anëtarësimit në organizata ndërkombëtare. Kryeministri Kurti këtu veçoi mbështetjen nga Irlanda për anëtarësim në Këshillin e Evropës, në të cilin Kosova ka aplikuar gjatë presidencës së Komitetit të Ministrave të Këshillit të Evropës nga Irlanda. Gjithashtu edhe për kontribut të hershëm e që vazhdon edhe sot në fushën e mbrojtjes përmes misionit të KFOR-it në Kosovë. Për këtë, kryeministri u shpreh se shteti dhe populli jonë janë gjithnjë falënderues e përgjithmonë mirënjohës. Gjatë bashkëbisedimit, ai gjithashtu e njoftoi kryeministrin Varadkar për zhvillimet e fundit në vend, progresin e arritur, qeverisjen e deritanishme dhe situatën aktuale.
Kryeministri Varadkar u shpreh mirënjohjes për mikpritjen gjatë vizitës së tij të parë në Kosovë. Ai tha se Irlanda vazhdimisht e ka mbështetur pavarësinë e Kosovën, duke qenë një nga shtetet e para që e ka njohur atë, dhe vazhdon ta mbështesë Kosovën në rrugë e saj evropiane. Kryeministri Varadkar ritheksoi mbështetjen e Irlandës për anëtarësimin e Kosovës në Këshillin e Evropës dhe Bashkimin Evropian, duke nënvizuar dhe vlerësuar përkushtimin e Kosovës ndaj vlerave të Bashkimit Evropian dhe linjëzimin me politikën e jashtme dhe të sigurisë të Bashkimit Evropian.
Në takimin dypalësh u diskutua mbi marrëdhëniet tona dypalëshe dhe mundësitë për t’i thelluar dhe zgjeruar ato, sa në rrafshin ekonomik e tregtar, ashtu edhe në atë kulturor, politik dhe diplomatik.
