Kryeministri Albin Kurti ka dalë para mediave pas takimit trepalësh të zhvilluar në Bruksel, ku ka thënë se s’ka pranuar një propozim që kushtëzohet zbatimi i marrëveshjes së Ohrit me Asociacionin. Ndër të tjera, ai ka folur edhe për masat e BE-së ndaj Kosovës.
Ai tha se de-eskalimi në Kosovë ka ndodhur, udhëzimi administrativ është nënshkruar, prandaj sipas tij, tashmë duhet të hiqen masat që i ka quajtur të padrejta.
“Sa i përket sanksioneve, de-eskalimi ka ndodhur në Kosovë. Ne duhet te kemi kujdes të mos ketë eskalim. Edhe konfiskimi i armatimit, edhe arrestimi i kriminelëve është në funksion të rendit dhe ligjit. Për neve sundimi i ligjit dhe deeskalimi nuk janë në kundërthënie. Andaj meqë ka ndodhur ky de-eskalim, udhëzimi është nënshkruar, rruga është e hapur që këto masa të padrejta që po e dëmtojnë shtetin më demokratik, të hiqen përfundimisht”, tha Kurti pas takimit në Bruksel
