Në vazhdën e hetimit të krimeve të luftës, Departamenti i Policisë Kufitare në bashkëpunim me hetuesit nga Drejtoria për Hetimin e Krimeve të Luftës, kanë ndaluar dje një 59-vjeçar.
Burimete Sinjalit brenda Prokurorisë kanë bërë me dije për Sinjalin se personi që u arrestua në Jarinje është Slavisa Nedeljkovicz.
I njëjti dyshohet për veprën penale “Krime lufte kundër popullatës civile” të kryer gjatë viteve 1998-1999 në komunën e Vushtrrisë.
Personi i dyshuar është shoqëruar në Polici, ku është intervistuar në prezencë të avokatit mbrojtës, lidhur me veprën për të cilën ngarkohet.
Lajmin e ka konfirmuar edhe Policia, me ç’rast është bërë e ditur se të gjitha procedurat e mëtejme do të ndërmerren në bashkërendim me organet e drejtësisë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
