Pas njoftimit se kandidati i LDK-së, për kryetar të Prishtinës, Përparim Rama nuk është certifikuar nga KQZ-ja, ka reaguar anëtari i LDK-së në KQZ, Florian Dushi, raporton Gazeta “Enigma”.
“Komisioni Qendror i Zgjedhjeve, përkatësisht Zyra për Regjistrim e Certifikim, është në fazën e shqyrtimit të kërkesave të subjekteve politike e kandidatëve për certifikim. Kjo është fazë e shqyrtimit, më pas do të pasojë vendimi përfundimtar i KQZ-së për certifikim”, tha Dushi përmes një shkrimi në Facebook.
Tutje, ai ka thënë se ka ndodhur një lëshim teknik, e se ekziston mundësia për evitimin e tyre.
LEXO EDHE: KQZ nuk e çertifikon kandidaturën e Përparim Ramës për kryetar të Prishtinës
“Në këtë fazë, lëshimet, sidomos ato teknike gjatë shqyrtimit nga ana e Zyrës janë të mundshme prandaj ekziston periudha dhe mundësia për evitimin e tyre”, thotë ai.
DUshi ka thënë se lëshimi ka ndodhur pa fajin e kandidatit Përparim Rama, për të cilin shton se ka dokumentacion të Kosovës.
“Madje, në këtë rast, lëshimi ka ndodhur pa fajin e kandidatit Përparim Rama i cili, ndryshe nga shumë kandidatë të tjerë, është i lindur dhe i rritur në Prishtinë, posedon dokumentacion të Republikës së Kosovës dhe plotëson të gjitha kushtet ligjore për t’u certifikuar si kandidat për Kryetar të Prishtinës”, shton ai.
