Shkëmb Manaj i LDK-së në një konferencë për media duke folur për programin e Qeverisë, ka thënë se nuk është marrë asnjë masë konkrete për “shtrirjen e autoritetit të plotë të Qeverisë në veri të vendit” siç është paralajmëruar nga kjo parti.
Manaj thotë se LVV trumbetonte sa ishte në opozitë, por tashmë nuk ka paraparë asnjë masë për këtë çështje, shkruan Gazeta Sinjali.
Madje ai thotë se në vend të kësaj, kjo qeveri ka vendosur që të paguajë rrymën për serbët në veri.
“Kjo qeveri nuk ka paraparë asnjë masë konkrete për veriun e Kosovës. LVV sa ishte në opozitë trumbetonte se në momentin që vjen në pushtet do të shtrinte autoritetin e plotë në veri të Kosovës. Prandaj LVV t’u shpejgojë qytetarëve se cilat janë masat që i ka marrë.
Nuk ka përcaktuar asnjë masë për t’i mbështetur institucionet e sigurisë në këtë pjesë të vendit. Qeveria nuk ka paraparë asnjë masë për kthimin e qytetarëve në veri të vendit, pra të shqiptarëve. Ata kanë zgjedhur që të paguajnë rrymën për serbët në veri.
Nuk ka strategji kombëtare për trajtimin e krimeve të luftës, që nuk janë trajtuar me seriozitetin e duhur. LDK vlerëson se nuk mund t’i qasemi kësaj çështje pa asnjë dokument strategjik”, tha Manaj.
