Mbrojtësi i Kombëtares shqiptare, Ardian Ismajli, ka folur për herë të parë pas transferimit te Torino, duke ndarë emocionet dhe pritjet për aventurën e tij të re në Serie A.
“Jam këtu prej disa javësh dhe ndihem shumë mirë. Qyteti më pëlqen shumë, edhe bashkëshortes sime. Torino është një klub me histori dhe tifozë të jashtëzakonshëm, prandaj kur më thirrën nuk hezitova.”, u shpreh Ismajli.
Ai kujtoi me krenari momentin kur mbajti shiritin e kapitenit me Shqipërinë.
“Jam ndjerë gjithmonë kapiten edhe pa shirit. Me Shqipërinë pata nderin ta mbaj shiritin, një moment historik për familjen time. Dua t’i ndihmoj të rinjtë, sepse vetë kam kaluar vështirësi dhe di si t’i përballoj”, theksoi ai.
Sa i përket përshtatjes në futbollin italian, Ismajli e quajti Serie A një realizim ëndrrash.
“Ishte ëndrra ime që kur isha fëmijë. Jam gati të përshtatem si në mbrojtje me tre ashtu edhe me katër lojtarë.”, pohoi ai.
Në fund, mbrojtësi shqiptar dërgoi një mesazh të qartë për tifozët.
“Luftëtarët nuk dorëzohen kurrë. Ky është shpirti që do të jap gjithmonë në fushë me fanellën e Torinos.”, përfundoi Ismajli.
