Lojtarët e Anglisë aktualisht po përgatiten për ndeshjen më të madhe të futbollit për vendin e tyre në 55 vitet e fundit.
“Tre Luanët” do të luajnë finalen e tyre të parë në një turne të madh që nga viti 1966, kur presin Italinë në Wembley në finalen e Euro 2020, që zhvillohet të dielën në mbrëmje.
I gjithë kombi anglez është prapa Gareth Southgate dhe lojtarëve të tij, ndërsa ‘It’s Coming Home’ është fraza në buzët e çdo personi anglez.
Finalja e së dielës pritet të jetë ngjarja më e shikuar në Mbretërinë e Bashkuar në të gjitha kohërat, ndërsa biletat e mbetura u shitën sapo dolën në treg.
Ndërsa lojtarët e Anglisë u larguan nga St. George’s Park për herë të fundit, ata u përcollën nga mijëra tifozë të cilët dolën në rrugë për t’i përshëndetur heronjtë e tyre.
Është e jashtëzakonshme që kaq shumë tifozë të Anglisë ishin të pranishëm në këtë rrugëtim të tyre.
Edhe lojtarët dukeshin të befasuar nga pjesëmarrja e njerëzve, ku nuk munguan fjalët e bukura për ta. /Gazeta Enigma/
