Milani ka shënuar fitore me rezultat 2-0 në udhëtim ndaj Lecces në kuadër të javës së dytë në elitën e futbollit italian.
‘Rossonerët’ menduan se kaluan në epërsi në minutën e katërt kur Matteo Gabbia realizoi për 1-0, por goli u anulua nga VAR-i për shkak të një ndërhyrje të palejueshme gjatë aksionit.
Mysafirët realizuan sërish në pjesën e dytë, kësaj radhe me anë të Santiago Gimenez, por goli u anulua sërish, këtë herë për pozicion jashtë loje.
Pas disa tentimeve të dështuara, Milani ia doli të kalojë në avantazh në minutën e 66-të përmes Ruben Loftus-Cheek i cili realizoi me kokë për rezultatin 1-0.
Në minutën e 80-të i inkuadruari në pjesën e dytë Samuele Ricci, bëri një goditje të fuqishme, por portieri vendas ia mohoi golin.
Për të shuar shpresat e vendasve për rezultat pozitiv u përkujdes Christian Pulisic, i cili realizoi në minutën e 86-të për epilogun përfundimtar 2-0.
Kjo ishte fitorja e parë për Milanin këtë edicion të ri të garave në Serie A, pas humbjes që pësuan në xhiron e parë në shtëpi ndaj Cremoneses me rezultat 2-1./
