Futbolli kosovar do të prezantohet në Champions League, Europa League dhe Conference League.
Kështu është bërë e ditur në faqen zyrtare të Federatës së Futbollit të Kosovës, e cila ka njoftuar se të drejtë pjesëmarrje nga edicioni i ardhëshëm, do të kenë, Kampioni, fituesi i Kupës, vendi i dytë dhe vendi i tretë në renditjen përfundimtare tabelare.
Me këtë rast presidenti i FFK-së, Agim Ademi, ka uruar në veçanti klubet e Superliges dhe futbollin kosovar në përgjithësi për këtë arritje për të cilën, tha se është punuar shumë.
“Ky është një lajm shumë i mirë për futbollin tonë. Jemi angazhuar shumë për këtë çështje, duke bërë kërkesa të vazhdueshme në UEFA, sepse jemi federata më e re e pranuar në FIFA dhe UEFA, por jo vetëm për këtë. Tani që Superliga është me 10 ekipe, nëse e llogarisim me përqindje i bie që 40% e ligës tonë të jetë në garat ndërkombëtare. Në këtë rast përveq punës tonë që e kemi bërë, i falënderoj shumë edhe organet e UEFA-s që na mirëkuptuan, por më së shumti i falënderoj klubet të cilat këtë vit kanë performuar dhe po performojnë jashtëzakonisht mirë, pasiqë koeficienti fitohet nga performanca e tyre. I uroj klubet e Superligës, të cilat sigurisht se do ta mirëpresin këtë lajm pasiqë shkuarja e më shumë ekipeve në Evropë nënkupton edhe rritje të ekonomisë në Kosovë, më shumë kualitet në futboll dhe organizim më të mirë të klubeve poashtu”, ka thënë presidenti Ademi.
