Komuna e Gjilanit ka njoftuar se është bërë përurimi i sistemit të ujësjellësit në fshatin Uglar.
Pjesëmarrës në inaugurimin e këtij projekti ishin kryetari i Komunës së Gjilanit Alban Hyseni, nënkryetarja Leonora Morina Bunjaku, ambasadori i Katarit në Tiranë dhe Prishtinë Jaber Ali Adouseri, drejtori i Qatar Charity në Doha Yousuf Al Kuëari, drejtori i organizatës Qatar Charity, Esam Dabab, disa nga deputetët nga Kuvendit të Kosovës nga Gjilani, ata nga KK Gjilan, drejtorë, zyrtarë të tjerë komunalë dhe përfaqësuesit e banorët e fshatit.
Kryetari Alban Hyseni, tha se janë mbledhur për të përuruar sistemin e ujësjellësit në fshatin Uglar, që ishte nevojë “imediate” e banorëve.
“Pas 9 dhjetorit të vitit 2021 kur e filluam qeverisjen lokale gjetëm 15 fshatra pa ujë të pijshëm. Sot ky është projekti i 5 që po e përmbyllim dhe se projekti i radhës tashmë ka nisur dhe po shkon drejt përfundimit”, tha Hyseni.
I pari i Gjilanit tregoi se vlera e investimeve në ujësjellës është 1.5 milionë euro, ku sipas tij, rreth 10 mijë banorë do të furnizohen me ujë të pijshëm.
Më tej kryetari shtoi se ky nuk është projekti i vetëm i përbashkët që realizohet, por janë edhe disa projekte tjera në fusha të ndryshme.
“Që nga fillimi me Qatar Charity që tashmë janë miqtë tanë, jemi dakorduar për një partneritet strategjik me projekte që kanë ndikim shoqëror”, tha Hyseni.
Kryetari uroi banorët e Uglarit për sistemin e ri të ujësjellësit.
Drejtori i operacioneve Abdulaziz Heji, tha se shpreson që ky bashkëpunim i mirë në mes tyre dhe Komunës së Gjilanit të vazhdoi edhe në të ardhmen.
“Ishte nder që të punojmë me popullin tuaj dhe shpresojmë që mbështetja të vazhdoi edhe pas realizimit të këtij projekti”, tha Heji.
Drejtori i operacioneve premtoi realizmin e projekteve të tjera për të mirën e qytetarëve. /Gazeta Enigma
