Veteranët e UÇK-së janë duke protestuar para ndërtesës së Kuvendit, duke kërkuar përfshirjen e kësaj kategorie në ngritjen e pagës minimale.
Mirëpo, ata kanë tentuar të hyjnë brenda Kuvendit, gjë që ka detyruar Policinë e Kosovës të gjuajë gaz lotsjellës, në mënyrë që t’i shpërndajë ata.
Ndyshe, pak minuta më parë ka filluar protesta e veteranëve të luftës së UÇK-së para Kuvendit të Kosovës, të cilët po kundërshtojnë mospërfshirjen e tyre në ngritjen e pagës minimale.
Ushtruesi i detyrës së kryetarit të OVL UÇK-së, Faton Klinaku ka thënë se veteranët ndihen të diskriminuar për shkak të anashkalimit të tyre.
“Do të dalim që të protestojmë të hënën. Do të fillojmë të mblidhemi prej orës 10:00, për ta kundërshtuar ndryshimin që do ta bëjë Kuvendi i Kosovës të këtij ligji”, ka thënë Klinaku.
Sipas tij, as qeveritë e kaluara e as kjo qeveri, asnjëherë nuk kanë krijuar komision për t’i kategorizuar veteranët e luftës dhe se ligji i vetëm që është në fuqi është ai që lidhet me pagën minimale.
