Njësia për Hetimin e Krimeve Ekonomike dhe Korrupsion, bashkë me Inspektoratin Farmaceutik ka kryer sot kontroll në një barnatore në Prizren, ku janë sekuestruar qindra paketime të barnave, raporton Gazeta Enigma.
Sipas Policisë, janë gjetur 280 paketime të barnave të ndryshme, që kapin vlerën e mbi 3 mijë eurove.
Në Polici është shoqëruar edhe pronarja e barnatores, ndaj të cilës janë iniciuar rastet si ‘kontrabandim me mallra’, ‘tregti e ndaluar’ dhe ‘shmangie nga tatimi’.
“Bazuar në këto informata, janë kryer veprime hetimore, kurse sot, më 05.07.2023, Gjatë inspektimit farmacistja C.Y. (viti i lindjes 1991, femër kosovare), e cila njëkohësisht është edhe pronare e barnatores, nuk ka ofruar dëshmi për origjinën e një sasise të konsiderueshme të barnave, të cilat barna medicinale janë sekuestruar nga Inspektorati Farmaceutik.
Sasia e barnave medicinale të sekuestruara është gjithsejte 280 paketime të barnave të ndryshme medicinale, me origjinë nga Serbia, Shqipëria dhe Turqia, në vlerë prej 3200 (tre mijë e dyqind) euro.”, njoftoi Policia. /Gazeta Enigma
