FBI-së i mungonin provat për të hetuar fushatën presidenciale të Donald Trump në vitin 2016 dhe u mbështet shumë në këshillat e dhëna nga kundërshtarët politikë të Trumpit për të nisur hetimin, shkruan në raportin e publikuar të hënën nga prokurori special i ShBA-së, John Durham.
Raporti shënon fundin e një hetimi katërvjeçar të nisur në maj të vitit 2019 kur Prokurori i Përgjithshëm i atëhershëm Ëilliam Barr caktoi Durham, një prokuror veteran, për të hetuar gabimet e mundshme nga FBI-ja kur ajo filloi hetimin e saj të fazës së hershme “Crossfire Hurricane” për kontakte të mundshme mes fushatës presidenciale të Donald Trump 2016 dhe Rusisë.
Hetimi i “Crossfire Hurricane” do t’i dorëzohej më vonë Prokurorit Special Robert Mueller, i cili në mars 2019 arriti në përfundimin se nuk kishte prova të një komploti kriminal midis fushatës së Trump të vitit 2016 dhe Rusisë.
Në raportin e tij të ri prej 306 faqesh, Durham arriti në përfundimin se inteligjenca amerikane dhe zbatuesit i ligjit nuk posedonin asnjë “provë aktuale” të marrëveshjes së fshehtë midis fushatës së Trump dhe Rusisë përpara nisjes së “Crossfire Hurricane”.
Ai gjithashtu akuzoi byronë për trajtimin e hetimit të Trump 2016 ndryshe nga hetimet e tjera të ndjeshme politikisht, duke përfshirë disa që përfshijnë rivalen demokrate të Trump, Hillary Clinton.
