Prokuroria Publike kundër Krimit të Organizuar në Beograd, ka njoftuar se do të kërkojë informacione shtesë lidhur me rastin e Aleksandar Vulin, drejtorit të Agjencisë për Siguri dhe Informacion (BIA).
Shtetet e Bashkuara kanë vendosur sanksione ndaj Vulinit më 11 korrik, nën dyshimet për korrupsion, trafikim droge dhe lidhje me Rusinë.
Prokuroria serbe përmes një deklarate tha më 14 korrik se do të kërkojë informacione shtesë nga institucionet vendore dhe gjyqësore të SHBA-së si dhe nga partnerët e tjerë ndërkombëtar. Ky institucion tha se do të kërkojë prova konkrete.
Prokuroria Publike kundër Krimit të Organizuar tha po ashtu se për sanksionet e SHBA-së ndaj Vulinit kanë mësuar përmes raportimeve të mediave.
Ky institucion tha se në kohën kur Vulin ishte ministër i Brendshëm dhe tani drejtor i BIA-s, institucionet ligjzbatuese kanë bashkëpuar dhe me sukses kanë zbuluar disa raste të krimit të organizuar, krimit të organizuar transnacional, dhe sipas prokurorisë zbulimi i këtyre rasteve u bë në bashkëpunim ndërkombëtar, shkruan REL.
“Gjatë punës në këto raste, si dhe në raste të tjera të kësaj prokurorie, asnjë institucion ndërkombëtar policor apo gjyqësor, si dhe asnjë institucion vendor, nuk ka konstatuar se Vulin është përfshirë në ndonjë aktivitet kriminal”, tha prokuroria serbe.
Presidenti i Serbisë, Aleksandar Vuçiq, ka deklaruar se Vulin është sanksionuar “sepse unë nuk kam vendosur sanksione ndaj Rusisë”.
Vuçiq po ashtu ka deklaruar se sanksionet ndaj Vulinit nuk kanë të bëjnë asgjë me armë apo drogë.
Sipas SHBA-së, Vulin është përfshirë në krim të organizuar transatlantik, në operacionet joligjore narkotike dhe në keqpërdorim të detyrës zyrtare. Vulinin po ashtu akuzohet se ka “avancuar” korrupsionin brenda institucioneve qeverisëse serbe.
“Ai ka përdorur pozitat publike për të mbështetur Rusinë, për të lehtësuar aktivitetin malinj të Rusisë që degradon sigurinë dhe stabilitetin e Ballkanin Perëndimor dhe i ofron Rusisë një platformë për të përhapur më tej ndikimin e saj në rajon”, është thënë në njoftimin e Departamentit amerikan të Thesarit.
