Kryetari i Prishtinës, Përparim Rama, tha se vendimi i Gjykatës Komerciale për pezullimin e punës për ndërtimin e “Rrugës A” ishte krejtësisht i panevojshëm.
“Nuk ka asnjë logjikë, kurrfarë logjike të ndalet projekti, nëse dikush mendon se ka probleme ligjore ato duhet të definohen me ligj, nëse është një palë kundër një pale tjetër le të vazhdoj procedura, por projekti nuk ka arsyeshmëri të ndaljes, nëse një palë fiton se i qenka bërë e padrejtë paguhet ajo palë që i janë bërë”, tha Rama në Klan Kosova.
Rama tha se pikërisht kompania e cila është kontraktuar për ndërtimin e “Rrugës A” është duke punuar aktualisht në dy projekte të qeverisë, prandaj beson se vendimi për pezullimin e punës për ndërtimin e kësaj rruge ishte “puro politik”.
“Projekti i kompanisë e cila është duke kryer punë sot e cila paralelisht sot kryen punë për kryeqytet dhe për qeveri në dy projekte tjera, domethënë e njëjta kompani për qeverinë nuk ka problem, por për kryeqytet paska problem. Si bëhet kur për punët që i kryen për qeveri… janë dy projekte që kryhen ndërsa për kryeqytet po u dashka në ndalen, kjo më bën me dyshu që këto janë procese që nuk kanë asnjë logjikë tjetër përveç intervenime puro politike për ndalesën e transformimit të kryeqytetit”, tha Rama.
Rama shtoi se gjykatësja e Gjykatës Komerciale, e cila ka marrë vendim për pezullimin e punës në këtë rrugë, është e lidhur me Qeverinë Kurti.
“Nëse kjo rrugë është ndalë nga Gjykata Komerciale, nga një person i lidhur me qeverinë pa asnjë arsye, sepse ekziston paralelisht një proces që mundet me vazhdu pa pasur nevojë të ndalesës së projektit, e tash e njëjta kompani sot kryen punë për qeverinë, përse nuk u ndalën atje punët, përse po ndalen këtu?”, pyeti Rama.
