Autoritet e Serbisë kanë vendosur që këtë vit të mos lejojnë gërmime një varrezë të dyshuar afër Novi Pazarit, ku dyshohet se mund të ketë trupa të të zhdukurve gjatë luftës në Kosovë, raporton Gazeta “Enigma”.
Sipas tyre kjo ndalesë është bërë nën arsyetimin e specifikave të lokacionit dhe vështirësive në terren.
Edhe në të kaluarën Serbia i ka zvarritur kërkimet me vite në lokacione të ndryshme, prandaj nga Komisioni Qeveritar për Personat e Zhdukur presin që të paktën në dy lokacione të tjera brenda Serbisë të lejohen gërmimet, përfshirë edhe Batajnicën.
Pas disa takimeve dhe dakordimeve përgjatë gjithë vitit, më 27.08.2024 përfaqësuesit e Kosovës e morën rrugën për në një lokacion afër Novi Pazarit dhe nisën përgatitjet për gërmime afër një deponie të mbeturinave, ku dyshohet se mund të jenë varrosur trupat e të zhdukurve gjatë luftës në Kosovë, ka raportuar tv Dukagjini.
Këtë të premte (18.10.2024) një përfaqësues i Institutit të Mjekësisë Ligjore dhe i Komisionit Qeveritar për Personat e Zhdukur udhëtuan përsëri për në Serbi, me shpresë se po marrin lajme të mira, por u kthyen të zhgënjyer.
Serbia ka vendosur që nisjen e gërmimeve në Kozhle ta shtyjë për vitin tjetër, pavarësisht që procesi ishte paralajmëruar të niste në mesin muajit shtator të vitit 2024.
“Për shkak të juridiksionti është në vendimarrjen e tyre dhe në bazë të konfirmimit që kemi marrë nga ekspertët tonë për shkak të specifikave të këtij lokacioni, ky rast do të bartet për vitin e ardhshëm. Jemi njoftuar që në këtë rast pala serbe, nuk do të përjashtëojë mundësinë, dhe sipas të gjitha gjasave në bazë të rrethanave dhe prezantimit të specifikave të lokacionti dhe vështirësive të hasura në terren që ky rast mund të bartet për në vitin e ardhshëm” – ka thënë Kushtrim Gara nga Komisioni Qeveritar për Personat e Zhdukur.
Tash kur gërmimet në këtë lokacion janë anuluar për këtë vit, në pikëpyetje janë edhe dy vende të tjera brenda territorit të Serbisë.
“Krahas lokacionit të Kozhles që e potoncova, pra nuk është diçka që ne nuk e kemi pritur, duke pasur parasysh përvojën në Rudnicë dhe Kizhevak, megjithatë edhe një përgjigje e tillë është zhgënjyese…. po bëjmë përpjekje, dhe në komunikimin që kemi edhe me partnerët ndërkombëtar duke pasur parasysh edhe dakordimin gjatë takimeve që i potencova, që në qoftë se jo në Kozhle atëherë sa më parë të vazhdohet më gërmimet në lokacionin, në Kozarezd dhenë lokacioent në Batajnicë, që rasti i Batajnicës mbetet njëri nga prioritet” – ka thënë Kushtrim Gara nga Komisioni Qeveritar për Personat e Zhdukur.
Zvarritja e nisjes së gërmimeve për kryetarin e Këshillit të Familjarëve të të Pagjeturve është e pritshme dhe zhgënjyese për familjarët që presin t’i gjejnë më të dashurit e tyre.
“Pritjet e familjarëve, është një traumë një gjendje traumatike e tyre kur dihet se ka varreza masive në Serbi, Serbia nuk e shiqon më si proces humanitar pro gjithnjë e neglizhon si proces politik, sa herë që i duhet Serbisë të ngrisë diçka e përmend si problem politik” – ka thënë Ahmet Grajqevci, kryetar i Këshillit të Familjarëve të të Pagjeturve.
Grajqevci thotë se prej Serbisë nuk pritet asnjëherë që të ketë vullnet për t’i gjetur edhe rreth 1600 të zhdukur gjatë luftës së fundit, shumica dërmuese shqiptarë.
Në anën tjetër Gara thotë se brenda territorit të Kosovës janë kryer gërmime në rreth 15 lokacione, e ku bashkë me gërmimet në vitin paraprak, janë gjetur mbi 20 trupa, të cilët janë në proces të identifikimit. /Gazeta Enigma/
